បាត់ដំបង៖ ទីលានទុកដាក់សំរាមទំហំ ២០,៨០ហិកតា ដែលស្ថិតនៅភូមិប៉ោយស្វាយ ឃុំតាគ្រាម ស្រុកបាណន់ ក្រុង-ខេត្តបាត់ដំបង ត្រូវបានដាក់សម្ពោធដាក់ឱ្យប្រើប្រាស់ជាផ្លូវការនាព្រឹកថ្ងៃទី២០ ខែមីនា ឆ្នាំ២០២៣ ក្រោមអធិបតីភាពទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល។
សមិទ្ធផលដ៏ថ្មីមួយនេះ អាចមានសមត្ថភាពអាចផ្ទុកសំរាមបាន ៣១៣ ៧០៣ម៉ែត្រគូប សម្រាប់រយៈពេល ១០ឆ្នាំ ពីឆ្នាំ២០២២ រហូតដល់ ២០៣២ សម្រាប់ប្រជាជន ក្នុងក្រុងបាត់ដំបង និងស្រុកដែលនៅក្បែរទីលានទុកដាក់សំរាម។ តាមការរំពឹងទុក ប្រជាជនប្រមាណ ៦០ភាគរយ ដែលត្រូវជាង ១សែននាក់នឹងទទួលបានសេវាកម្មផ្នែកអនាម័យបរិស្ថានពីទីលានចាក់សំរាមមួយនេះ។
ទីលានចាក់សំរាមនេះ ប្រើប្រាស់ថវិកាជាង ៦លានដុល្លារ ក្រោមគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប និងជំហានទី២ ក្រោមកម្ចីឥណទានធនាគារអភិវឌ្ឍន៍អាស៊ី (ADB)។
អភិបាលខេត្តបាត់ដំបង លោក សុខ លូ បានថ្លែងឱ្យដឹងនៅក្នុងសន្និសីទសារព័ត៌មានស្តីពី «ភាពជោគជ័យរយៈពេល៥ឆ្នាំកន្លងមករបស់រដ្ឋបាលខេត្តបាត់ដំបង» កាលពីថ្ងៃទី២៤ ខែមករា ឆ្នាំ២០២៣ ថាបាត់ដំបងគឺជាខេត្តដែលកំពុងមានការរីកចម្រើនដែលធ្វើឱ្យខេត្តមួយនេះបង្កើតនូវសំរាមក្នុងមួយថ្ងៃ ៣០០តោន ដោយបច្ចុប្បន្នខេត្តមួយនេះមានក្រុមហ៊ុនប្រមូលសំរាមតែ ២ប៉ុណ្ណោះ ខណៈពលរដ្ឋប្រមាណ ៥០ភាគរយមិនបានបង់សេវាប្រមូលសំរាម៕